每一次鬼上身（上）
「我講咗『唔得』，我都要正常生活㗎，點可以晚晚都俾鬼上身？」
你點會估到，呢一句說話，我幾乎晚晚都要講。
我叫阿晨，一日之計在於晨個「晨」，但關於我嘅故事，往往喺夜晚發生。
自細我就發現，我嘅體質同其他小朋友唔同，我好容易俾鬼上身，所以都好受鬼歡迎。
好多鬼都有未了嘅心願，需要一副人嘅身體去完成。
所以，一過咗子時，身體好多時就唔再受我控制。
我會自己走出門口，搭的士去墳場，走去某個墓碑前，充滿感慨咁撫摸塊碑。
我會去一個陌生嘅屋企，攬住一個比我大二十年嘅人，淚流滿面咁叫佢：「阿仔！」
我仲會打奇怪嘅電話，用稚嫩嘅童聲，交待自己收埋咗幾多遺產。
每一次，我都控制唔到自己嘅身體，但可以充份感受到身體嘅感受。
你問我驚唔驚鬼？其實我唔驚。
因為有一次，有隻戀童癖嘅鬼上咗我身，佢除咗我條褲，正諗住做啲奇怪嘅事。
突然間，幾十隻鬼出現喺我身邊，合力將個戀童癖「推」出嚟，再將佢打鑊金，睇到我目瞪口呆。
佢哋同我講，可以接受鬼上身嘅體質係好罕有，而每隻鬼都有想上身實現願望嘅時候，佢哋一定會好好保護我，令我唔俾鬼傷害。
「其實我晚晚俾鬼上身，都係傷害我嘅一種。」我忍唔住講。
當然，每一隻鬼都保持沉默。
於是我繼續俾鬼上身，繼續實現唔屬於我嘅願望。
好彩，隨住我慢慢長大，自己嘅靈魂愈嚟愈強大，鬼冇咁易上身。
應該話，除咗一啲意志特別強大嘅鬼，大部份鬼都要得到我同意，我放開自己嘅思想，佢哋先可以上我身。
於是，我幾乎晚晚都要花時間，去拒絕唔同嘅鬼。
我拒絕咗無數隻鬼，嚟搵我嘅鬼都愈嚟愈少。
我以為我已經擺脫咗呢個命運，直到有一晚，幾十隻鬼喺我面前出現，團團圍住我。
「喂，你哋想點？鬼多蝦人少？」我知道，平時佢哋都係排好更，輪流嚟搵我，絕對唔會「爭位坐」。
佢哋紛紛投訴，話我依加唔肯俾鬼上身，令佢哋實現唔到願望。
我忍唔住問：「我點解要幫你哋？我已經幫咗咁多年。」
「助人為快樂之本！」唔知邊隻鬼答。
我火都嚟：「我試過俾女鬼上身，要攬住另一個男人話：『老公我好愛你，你要好好照顧自己』，噁唔噁心啊？」
「其實我哋以前想畀錢你。」有隻睇落好闊綽嘅肥鬼忽然話：「有諗過每次上身，都叫陽間嘅屋企人畀一萬幾千你。」
我眼前一亮：「咁幾好喎，我全職俾鬼上身，日頭唔駛返工。」
肥鬼解釋：「按照地府嘅規定，地府鬼魂企圖用陽間嘅金錢做交易，係會折損賺錢人，即係你嘅陽壽。」
我都唔知佢講真定假，總之佢言下之意，就係我唔可以咁樣賺錢。
我發晦氣：「咁即係你哋冇嘢幫到我啦？你哋咩都做唔到啦？」
突然有隻鬼大叫：「我識煮飯！」
其他鬼都紛紛講出自己嘅專長：「我識跳舞！」「我識唱歌！」
「做乜啫？你哋表演想畀我睇？我要睇表演不如睇《全民造星》，睇你哋把鬼？」我冇佢哋咁好氣。
「咪住先，做星嗰個……可以係你！」肥鬼好似「叮」一聲咁望住我。
佢講咗一個建議，一個好有趣嘅建議。
每一隻鬼都佢嘅專長，可能識唱歌、跳舞，可能讀書好叻，可能擅長講嘢，就算係一個家庭主婦，都特別擅長煮飯。
肥鬼話：「如果你咩都識，咁你咪勁過晒所有明星？」
「佢哋咁多隻鬼，可以一齊上我身？」我呆咗。
我本來以為，我就算擁有某隻鬼嘅技能，我都只可以轉份工，識跳舞咪做Dancer、識煮飯咪做廚師，根本冇咩著數。
但我從來冇諗過，我可以擁有咁多唔同嘅技能，由一個廢青，變成一個全能嘅人。
「唔係，逐隻嚟。你需要咩技能，就由邊隻鬼上你身。」肥鬼循循善誘：「直播主播都係咁啫，今日表演跳舞、聽日表演煮嘢食、後日可以彈結他……」
我忍唔住上網search，依加男男女女都會做直播，有啲人技能明明好單調，但都吸引到好多fans，係咁有廣告接，財源滾滾來。
肥鬼努力鼓勵我：「我哋入夜後先上到身，所以你要做藝人就難啲，但做直播就唔同睇，你可以晚晚都開直播嘛。」
待續...
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #每一次鬼上身
Search